11-12-11
|
المشاركة رقم: 1 (permalink)
|
| البيانات | | التسجيل: | Dec 2011 | | العضوية: | 7754 | | المشاركات: | 15 [+] | | بمعدل : | 0.09 يوميا | | اخر زياره : | [+] | | معدل التقييم: | 0 | | نقاط التقييم: | 10 |
| الإتصالات | | الحالة: | | | وسائل الإتصال: | |
| المنتدى :
حـواء وأمومة و طفولة  انضمي انتي كمان في حملة هثقف نفسي و هثقف ولادي حبايبي
ازيكم ياقمريات قلبي؟
وحشتوني أهلا هههههههههههههههه
يا رب تكونوا كلكم بخير و قبل ما ادخل في الموضوع احب انبه انه موضوع طويل بس ان شاء الله هيفيد كل الفتوكات و هيفيد اولادهم....
بس عشان خاطري ما تطلعيش من غير ما تقريه... والله قصدي خير و لن يؤمن احدكم حتى يحب لأخيه ما يحب لنفسه... و انتوا والله اخواتي و ربنا عالم قد ايه بحبكم...
المهم ندخل في الموضوع...أنا عايزة اسألكم شوية اسئلة الاول...
بتتكلمي كام لغة؟
هل بتقدري تجاوبي على كل اسئلة ولادك لما بيسألوكي يا ماما ليه السماء زرقاء؟
يعني ايه يا ماما ليبيرالية؟
ماما مقدمة البرنامج بتقول متلازمة راي يعني ايه؟
قريتي كام كتاب الاسبوع ده؟ بلاش الاسبوع ده! قريتي كام كتاب في حياتك!
ما تعديش معاهم المناهج! آه منك يا غشاشة ههههههههههههههههههههههههه
بتعرفي كام شخصية دينية؟
حافظة كام حديث نبوي شريف؟
عارفة مين مكتشف فن الموشحات؟
طيب بلاش دي، مين مكتشف الدورة الدموية؟
بلاش دي كمان! عارفة يعني ايه كروموسومات و الخريطة الوراثية؟
تقدري تشاركي في مسابقة تقافية من غير ما يبقى فيها اختيارات؟
للأسف لأ...
دي مش اسئلة عايزاكي تجاوبيني عليها ... دي اسئلة ببينلك بيها انك محتاجة تثقفي نفسك... اني محتاجة اثقف نفسي.. انها محتاجة تثقف نفسها... المرأة العربية محتاجة تثقف نفسها...
كلنا عارفين التعليم العربي العقيم اللي للأسف يعتبر اول و اكبر عامل لتخلف اممنا العربية و الاسلامية...
بس الحمد لله على نعمة الاسلام
اول كلمة نزلت من القرآن كانت ايه؟؟
اقـــــــــــــــــــــــــرأ
و الرسول صلى الله عليه و سلم وصانا على طلب العلم و شجعنا على ذلك...
اشهر ما نسمع هذه الايام و مش عارفة اضحك ولا ابكي لما اسمع الجملة دي الصراحة
( العرب اخترعوا الصفر و بقوا فيه )
العرب ما اخترعوش الصفر بس ، مين هو ابن سينا ..طيب عارفين من هو الرازي؟ و ابن الهيثم؟ ابن رشد؟ أبو جعفر الخازن؟ أحمد بن السراج؟
عارفين انه اسبانيا محتفظة بمخطوطات عربية مش ناويين يفرطوا فيها و لو اطربقت السما على الأرض؟ مخطوطات للهندسة المعمارية و الطب و الصيدلة و مخطوطات عسكرية ... العرب سابوها..
يعني العرب كانوا في قمة مجدهم و هما بيثقفوا و بيدرسوا و بيتعمقوا في مجالات مختلفة...
نيجي بقى لوضعنا دلوقتي ...
دلوقتي نادر جدا لما تلاقي شاب عنده 20 سنة ماسك كتاب و قاعد ف اوضته بيقرا... او بيحوش من المصروف عشان يشتري مجلة علمية؟
هتقولولي لا ما دلوقتي بقى زمن الاعلاميات! ايوة والله ده زمن الاعلاميات! يعني كل حاجة متوفرة... يعني لما بيقعد على النت بيدخل يقرا عن سقوط الدولة العثمانية؟ ولا بيدخل يقرا عن مملكة يهوذا؟ او بيدخل يعمق دراسته في المجال اللي بيدرسه! والله ما هيزيد كلمة على المنهج ههههههههه
كان عندنا دكتور في الكلية كان دايما بيقولنا.. زمان كنا بنلم فلوس مع بعض انا و اصحابي عشان نشتري كتاب و كنا بنتخانق من هياخذه الاول... دلوقتي الشباب بتلم فلوس عشان يلعبوا بلاي ستيشن ههههههههههههههههههه
شبابنا ( مش بعمم في شباب بسم الله ما شاء الله واعي جدا ) بس عينة كبيرة اوى في قاموسها نت يعني فيسبوك يعني اسلي نفسي شوية يعني احمل افلام... يعني اثبتلي بنت او بنتين ...
الرجالة النت بالنسبالهم كورة اخبار رياضية و في وقت الغفلة يتفرج على صور المزز و ينتحل شخصية تانية باكوانت ع الفيسبوك..
الستات بقى نت يعني طبيخ على فضفضة..
البنات النت ده طريقة عمل الميك آب و الفضفضة و اللبس و حاجات تانية كثيرة اكيد كلنا عارفينها...
بنقضي وقت كبير على النت بس يا ترى بنطلع بكام معلومة في آخر اليوم؟
احمد شوقي امير الشعراء قال ايه؟
الأم مدرسة اذا اعددتها اعددت شعبا طيب الأعراق...
يعني مفتاح تقدم الامم هو المرأة... و اكيد اللي مهتم بتاريخ اسرائيل و اليهود هيفهم انهم بيستهدفوا البنات و الستات تحت مسمى التفتح ( ده موضوع تاني لو عايزيني اكتب فيه هكتب ههههههههههههههههه ان شاء الله )
يعني عشان المجتمع يبقى مجتمع مثقف هنبتدي من الام... تخيلوا أم بنت ناس اتربت احسن تربية.. مسلمة... اتعلمت او ما تعلمتش ( حسب ظروفها ) بس مثقفة و بتثقف نفسها كل يوم عشان تساير تطور المجتمع و العالم و تساير ولادها و تعرف تربيهم...طيب ازاي؟ انا مش فاضية بجد!
ازاي مش فاضية؟
بين شغل البيت و خدمة جوزي و عيالي و مسؤوليات تانية كثير...
بس بتقعدي على فتكات صح؟
ايوة..
اقل حاجة بتقعدي بتاع ساعة في اليوم ده اقل حاجة؟
ايوة فعلا...
السنة كام فيها من يوم؟
365 يوم
لو كل يوم دورتي على معلومة و قريتيها سواء ثقافة عامة او حفظتي حديث او اتعرفتي على شخصية سياسية او تاريخية هتلاقي نفسك في السنة بتعرفي 365 معلومة صح؟
آه والله فعلا..
شفتي قد ايه حاجة بسيطة مش بتاخذ منك وقت كبير خالص...
الطريقة دي بابا و ماما ربنا يخليهم ليا علموهالي من وانا صغيرة خالص..
أنا الحمد لله دلوقتي بتكلم 3 لغات بطلاقة غير العربي...
بتعلم لغة رابعة و بدرس علم النفس مع انه بعيد عن مجال دراستي الحقيقي... بحب اقرا عن الدول .. الدولة الفاطمية العثمانية.. الادارسة... بحب اقرا كتب التاريخ عن الفينيقيين و عن و عن و عن ......
ناوية اعمل كده مع اولادي... كل يوم معلومة و كل يوم مفرد هنتعلمه في اللغة ( ربنا يرزقني و اياكم الذرية الصالحة )
انتي كمان اعملي كده مع اولادك... مش لازم تقعديهم جمبك عشان يتعلموا و انتوا راكبين في العربية او قبل ما يناموا او و انتوا بتتفرجوا ارميلهم معلومة او كلمة او حديث و هما هيلقطوه صدقوني...
في 10 سنين هيكون عندهم مش اقل من 3650 معلومة ....
حلو اوى نشوف اطفالنا دماغهم مثقفة و متعلمة بس ده مش هيحصل اللي لو ابتدينا من نفسنا...
تعليمنا عقيم للأسف و حتى لو وديناهم مدارس لغات مش هياخذوا اكثر من المنهج يبقى نساعد احنا كمان صح؟؟؟
شعب في القمة هو الشعب المثقف و احنا ديننا و لله الحمد شجعنا على طلب العلم...
لو انتي و هيا و هيا ثقفتوا نفسكم صدقيني حياتكم هتتغير.. و حياة اطفالكم... اللي هما شباب المستقبل...
ايه الفرق بينا و بين الدول المتقدمة... العلم... الثقافة ... مفاتيح النجاح الاقتصادي و الصناعي و الصحي..
يا ريت تشاركوني بأفكاركم و آراءكم يا فتوكات ...
ربنا يباركلكم في اولادكم و ينصر المسلمين في كل بقاع الأرض
اسيبكم في آمان الله
|
|  |
العرض العادي
